0

Aaya rakhi ka tyohaar

Aaya rakhi ka tyohaar,
dekho bhaayi bahan ka pyaar,
kitni paawanta laaya hai,
baandh ke patla taar.

behana hansti muskaati,
aur pooja ka thaal sajaati,
bhaiya ki umar ho baras hazaar,
aaya rakhi ka tyohaar.

bhaiya deta yeh vachan,
raksha mein tan, mann, dhan,
jeevan bhi dega vaar,
aaya rakhi ka tyohar.

jaati dharm nahi vyavdhaan,
jaisi dharati khula aasmaan,
dhoop-chandani sa barse pyaar,
aaya rakhi ka tyohaar.

0

Bahanon ki bahumulya nidhi

Ghata ghanghor ghir rahin,
ghar-ghar khushi apaar.
bahanon ki bahumulya nidhi,
ye raakhi ka tyohaar.

ye do dhaage prem ke,
karte aaj pukaar.
har yuvati hai behana apni,
kul vasudha hai parivaar.

sneh ka drin bandhan hai jaano,
rakhi ka tyohaar.

0

Meri Behan

Gudia jaisi meri behana,
maane ye sabka kehana.

Billo Rani badi sayaani,
peeti doodh bataati paani.

Hansati rehati khil khil khil khil,
din bhar khele sabse hilmil.

Khana khati jhatpat jhatpat,
daud lagaati sarpat sarpat.

Billo Rani aisi natkhat,
karati rehati hardam khatpat.

Zara nahi karati aaraam,
bas khush rahana uska kaam.

0

Aaj behan ne bade prem se

Aaj behan ne bade prem se,
rang birangaa chauk banaaya.
isake baad chauk ke upar,
apane bhaiya ko baithaya.
rang birangi raakhi baandhi,
fir sundar sa tilak lagaaya.
gol gol rasgulla khaa kar,
bhaiya mann hi mann muskaaya.
Thaal saja kar deep jala kar,
bhaayi ki aarti utaari.
mann hi mann mein kehati behana,
bhaiya rakhana laaj humaari.
karna sada behan ki raksha,
bhaiya tumko samjhaata hai.
kachche dhaagon ka ye bandhan,
raksha bandhan kehalaata hai.